Send WhatsApp 語音訊息原來是一種罪......

要數最近嘅網絡熱話，一定非「WhatsApp 錄音留言 7 宗罪」莫屬。回想小記自己首次接觸語音訊息，應是在數年前到西藏旅行、安裝強國通訊軟件《WeChat》，而呢個功能依家已經幾乎成為所有通訊 apps 必備功能。

坐係巴士地鐵亦不難見到有人瘋狂密集式咁 send 語音 WhatsApp 語音訊息俾身邊朋友。錄音時那些叮叮噹噹聲，有時都難免令人覺得有啲討厭，更有不少「大媽」開盡 speaker 去聽語音訊息，亦令呢個本身求方便嘅功能，形象會變得負面起嚟。

對於 WhatsApp 語音訊息，小記嘗試以「個人身分」出發，分析一下呢個功能究竟有乜優缺點，以及使用時要點樣做，先唔好打擾到身邊嘅人。

【缺點】林芷彤「免責聲明」語音數據量係文字 57 倍！

喺網民 Alex Tsang「WhatsApp 錄音留言 7 宗罪」當中，佢就話錄音留言係浪費數據，究竟實情又係點嘅呢？

小記就特別邀請咗「免責聲明急口令女皇」林芷彤 BB…….條 YouTube 片嚟做個小測試，林 BB 15 秒嘅極速免責聲明，用 WhatsApp 嘅語音留言 send 出去，就大約用咗 68 KB；轉為將合共 139 個字嘅免責聲明用文字 send 出去的話，就只係用咗 1.2 KB。

雖然話 15 秒用 68 KB，一分鐘語音都唔使 300 KB，但我估計我哋平民百姓講嘢應該唔會快得過林芷彤，如果一日到黑都 send 語音訊息，計落數據用量真係比用文字 message 多好多。

【缺點】外遊用語音，小心爆 data！

既然語音訊息較文字訊息用多咁多數據用量，喺香港你屋企公司食飯飲嘢處處 Wi-Fi 嘅環境下，或者都無乜大問題，但如果你出國旅行的話，呢條數就真係要留意一下啦。

雖說依家應該無乜人去旅行仲會用漫遊上網，但租借 Pocket Wi-Fi 去旅行，有啲地方都會有用量上限，如果因為瘋狂 send 語音留言而燒盡曬啲數據，無得 upload 旅行靚相呃 like，咁就真係得不償失啦。

更重要嘅係如果你用 WhatsApp，原來講到明所有語音訊息都會被自動下載，無得 say no，亦即係有人瘋狂 send 錄音俾你你都要硬食，如果月尾數據流量所餘無幾時遇到呢啲情況，都咪話唔頭痕呢。

【優點】錄音留言也有窩心時

雖然數據流量真係比文字大好多倍，但小記個人對接收錄音留言其實並唔抗拒。就好似母親節，有親戚嘅小朋友特別錄低一段說話，送俾 group 內所有偉大嘅媽媽，就算自己呢一世都無可能做人阿媽，聽番都覺得好窩心，而呢個方法亦比逐個打電話去祝人哋母親節快樂更有效率。

又例如屋企人知道自己有嘢忙緊，無時間接到電話，錄個語音訊息等你有時間先覆番，亦可避免有時因為忙到成頭煙個陣仲要接電話，而搞到語氣唔好呢啲摩擦發生，都係語音訊息比文字或電話更為適合的情況。

【優點】說話比文字更暢所欲言

呢個情況小記自己做嘢就試過啦。話說有次個受訪者去咗美國，佢就選擇用語音留言嚟接受訪問，既唔使理時差問題，又唔使小記一邊訪問一邊抄重點，最重要嘅係打字始終會經過一定程度思考，而錄音說話嘅內容就顯然更為直接了當，真正做到暢所欲言，令該個訪問出嚟嘅內容猶如真正面談，又免卻受訪者要長篇打字，最終內容仲幾令人滿意添。

【優點】老人家小朋友都可保持溝通

又拉番去網民 Alex Tsang 嘅七宗罪，佢話「不懂打字、打字唔夠快不是藉口」，某程度上小記係認同嘅，但只限對身邊朋友，始終依家無人不識電腦，唔識打字其實說不過去。

但對於上一輩家人，或者幾歲大嘅可愛小朋友，你要佢哋打字或者用手寫輸入，其實都係有點強人所難，用多兩用最後佢哋或者就會放棄，咁咪又係攪到無法保持溝通。

用語音訊息……最緊要考慮別人

最後利申，對於語音訊息小記其實好少 send，但就唔抗拒收到，但相信不少人同我一樣，都好唔鍾意喺公共交通工具上聽到其他人開行喇叭聽語音訊息，兼夾一分鐘 Send 十幾個出去。

因此，作為一個有公德心嘅 ezone.hk 粉絲，建議大家用語音訊息個陣，一定要考慮埋別人感受，要瘋狂錄音可以校番做靜音模式，等開始同完成錄音個兩下叮叮聲消失，聽錄音個陣就帶耳機或者用番聽筒聽啦，最好就教埋唔係幾識用智能裝置嘅屋企人同小朋友啦。

原文刊於ezone.hk